MENU
स्वास्थ्य चौकी नै अस्वस्थ
 : 41 views
  Dec 21, 2018

बाँकेको जानकी गाउँपालिका–४ स्थित बेलहरी स्वास्थ्य चौकी आफैं अस्वस्थ देखिएको छ।

स्वास्थ्य चौकीको भौतिक पूर्वाधारको कुरा त परै जाओस् यहाँ उपचार गराउन आउने बिरामीलाई न औषधिसँगै पिउने पानीको व्यवस्था छ, न त बिरामी जाँच गर्ने कोठा नै छन्। कोठाको अभावमा जाँच गर्न आउने बिरामी भवन बाहिरै पालो पर्खिनुपर्छ।

 

स्वास्थ्य चौकीमा न्यूनतम आधारभूत सेवासमेत उपलब्ध नभएको स्वास्थ्य चौकीका प्रमुख अहेव टामलाल बेल्वासेले बताए। ‘स्रोतसाधन छैन, ६ महिना भयो, विद्युतको बिल तिर्न सकेका छैनौं’, उनले प्रश्न गरे, ‘वडा कार्यालयमा यस विषयमा पटक–पटक जानकारी गराइएपनि सुनुवाइ भएन, अब कहाँ भन्न जाने?’

 

विगतमा जिल्ला जनस्वास्थ्य कार्यालयबाट बहिरङ्ग सेवा सञ्चालनका लागि रकम आउने भए पनि स्वास्थ्य संस्था स्थानीय तहमा हस्तान्तरणपछि भने आयस्रोत ठप्प भएको छ। गाउँपालिकाका स्वास्थ्य शाखा संयोजक गीरबहादुर गुरुङले मसलन्द खर्चका लागि गाउँपालिकामा रकम माग गरिएको र उपलब्ध भए स्वास्थ्य चौकी सञ्चालनमा सहजता आउने स्पष्ट पारे।

 

प्रसूति केन्द्र प्रयोगविहीन

 

बेलहरी स्वास्थ्य चौकीमा ४ वर्षअघि प्रसूति केन्द्रको भवन बने पनि सञ्चालनमा आउन सकेको छैन। तत्कालीन जिल्ला विकास समितिको सहयोगमा प्रसूति केन्द्र निर्माण गरिएपनि त्यसका झ्याल र ढोका तोडफोड भएका कारण प्रयोगविहीन बनेको हो।

 

बिजुली बत्ती र खानेपानीको व्यवस्था नहुँदा प्रसूति सेवासमेत सञ्चालन हुन नसकेको स्वास्थ्य चौकी प्रमुख बेल्वासेको भनाइ छ। प्रसूति केन्द्र सञ्चालन नहुँदा प्रसूतिका लागि सदरमुकाम नेपालगञ्ज जानुपर्ने बाध्यता छ।

 

जानकी गाउँपालिकाका अध्यक्ष रामनिवास यादवले विगतमा बजेट विनियोजन भएपनि स्वास्थ्यका समस्या समेट्न नसकेको स्वीकार गर्दै आगामी दिन यसलाई प्राथमिकतामा राखिने बताए।

Comments

NIC Asia